ഞാൻ മേജർ അലക്സ് കുര്യൻ കോശി. തിരുവല്ലായി ലാണ് താമസം. കുര്യൻ അപ്പനാണ് . കോശി വല്യപ്പനും.
കാർഗിൽ യുദ്ധത്തിനിടെ എന്റെ നേരെ വന്ന ഒരു വെടിയുണ്ട തക്ക സമയത്തിന് മാറിയതു കാരണം ഇടുപ്പിലാണ് കൊണ്ടത്. അതു കൊണ്ട് നടക്കാൻ കുറച്ച് ബുദ്ധിമുട്ടുണ്ട്.

പട്ടാള സിനിമയൊക്കെ പിടിക്കുന്ന ഇരവിപ്പിള്ള എന്റെ ജുനിയറായിരുന്നു. ഞാൻ പഠിപ്പിച്ച ചില ടെക്നിക് ഒക്കെ നിങ്ങൾ ഇരവീടെ പടത്തിൽ കണ്ടുകാണും യുദ്ധസീൻ എടുക്കുമ്പോൾ സംശയം തീർക്കാൻ ഇരവി എന്നെ വിളിക്കാറുണ്ട്.
കഴിഞ്ഞ തവണ കണ്ടപ്പോഴാണ് പുതിയ ഒരു തെലുങ്ക് പടത്തിന് പറ്റിയ കഥ വേണമെന്ന് ഇരവി പറഞ്ഞത്.

എന്റെ കഥ തന്നെ എഴുതി ത്തരാം എന്ന് പറഞ്ഞിരിക്കുകയാണ്. അന്നു മുതൽ ഞാൻ വിവിധ രചനാ സങ്കേതങ്ങളേക്കുറിച്ച് പഠിച്ചു കൊണ്ടിരിക്കുകയാണ്. ബോധ ധാരാ സങ്കേതമാണ് കൂട്ടത്തിൽ എനിക്കേറെ ഇഷ്ടം. മനസ്സിനുള്ളിൽ ഒരു ക്യാമറ വെച്ച് ബോധധാരാ സമ്പ്രദായത്തിൽ ഒരു തിരക്കഥ വികസിപ്പിച്ചിട്ടുണ്ട്. വില്യം ജയിംസിന്റെ പുസ്തകം മുതൽ ജയിംസ് ജോയ്സും വെർജീനിയാവുൾഫും വരെ വായിച്ചു. മഹാത്മാഗാന്ധി യൂണിവേർസിറ്റിൽ ബോധധാരാ സമ്പ്രദായം ബാറ്റൺ ബോസിന്റെ കൃതികളിൽ എന്ന വിഷയത്തേപ്പറ്റി ഏതോ ഒരു ടീച്ചർ വെച്ച പ്രബന്ധം എനിക്ക് നന്നെ പിടിച്ചു. ഇനി തിരക്കഥയിലേക്ക് കടക്കാം.

എന്റെ കഥയുടെ നായകൻ ഞാൻ തന്നെയാണ്. എനിക്ക് നടക്കാൻ ബുദ്ധിമുട്ടായതു കൊണ്ട് ഇരവി എക്സേട്ടനെ (X-ഏട്ടൻ -> x ഒരു വേരിയബിളാണ് ഏട്ടൻ കോൺസ്റ്റന്റും. പൊങ്കാല വേണ്ട ) കാസ്റ്റ് ചെയ്യും. തെലുങ്കിൽ ബാലകൃഷ്ണയുടെ മാർക്കറ്റത്ര പോര. കൂടാതെ പട്ടാളക്കാരന് ഇത്തിരി കുടവയർ നല്ലതാ. എന്നേപ്പോലെയല്ലെ നായകൻ ഇരിക്കേണ്ടത്.

ഇനി ഓപണിംഗ് സീനിലേക്ക് വരാം.

ലൊക്കേഷൻ തിരുവല്ല റെയിൽവേ സ്റ്റേഷനാണ്. ഷുട്ട് ചെയ്യുമ്പോൾ സ്റ്റേഷൻ ബോർഡ് നൽഗോണ്ടാന്ന് തെലുങ്കിലെഴുതണം.

ഞാൻ (എക്സേട്ടൻ ) ട്രയിനിൽ ഇറങ്ങുന്ന സീനാണാദ്യം. ഷുസിൽ ഫോക്കസ് ചെയ്യണം . പിന്നെ പതിയെ കാൽ ,കുടവയറൊഴിവാക്കി നെഞ്ച് അവിടുത്തെ നക്ഷത്രം മുഖം മീശ എന്നിങ്ങനെ . പിറകിൽ ഫേഡ് ഓട്ടയി ഒരു ഖദർ ധാരി രണ്ട് പോലീസുകാരോടൊപ്പം നടന്നു വരണം. സാരേ ജഹാം സെ അച്ഛാ സിത്താറിൽ ബീജി എം.

ഇനി സ്റ്റേഷന്റെ വാതിൽക്കലേക്ക് ക്യാമറ. ഖദർ ഇന്നോവ ക്രിസ്റ്റയിലേക്ക് കയറുന്നു. ( തെലുങ്കിൽ ഓഡിയാകാം ) . പെട്ടെന്ന് എന്റെ(എക്സേട്ടന്റെ ) ഉള്ളിലുള്ള ക്യാമറ ചലിക്കുന്നു.(സംഗതി ബോധ ധാരാ സമ്പ്രദായമല്ലെ ) ഞാൻ (എക്സേട്ടൻ ) ബോധ ധാരയിൽ ഓടുന്ന സീൻ.

സ്റ്റേഷനു പുറത്ത് നിൽക്കുന്ന ഒരു ഓട്ടോക്കാരനെ ഞാൻ (എക്സേട്ടൻ ) വണ്ടിയിൽ നിന്ന് ചവുട്ടി പുറത്തിടുന്നു
“സോറി ബ്രോ “ (വളരെപ്പതിയെ)

ഞാൻ (എക്സേട്ടൻ ) ഓട്ടോ ഡ്രൈവർ സീറ്റിൽ.

ഇനി ചേസ് സീനാണ്
(ബോധധാരാ സമ്പ്രദായത്തിൽ ചേസ് എങ്ങിനെ നടത്താം എന്ന് യേൽ യൂണിവേർസിറ്റിയിൽ ഒരു പഠനമുണ്ട്.).

ഇന്നോവ mc റോഡിലേക്ക് തിരിയുന്നു. ( ബോർഡുകൾ തെലുങ്കിൽ വേണമെന്ന് കലാ സംവിധായകനോട് നിർദേശിക്കണം)

അഞ്ചു മിനിട്ട് ചേസ് നടത്താം. ഇടക്ക് മുളകുപാടം, ആട്ടിൻപറ്റം, നഴ്സറിക്കുട്ടികൾ തുടങ്ങിയവ ആവശ്യാനുസരണം. (സംവിധായകന്റെ ക്രാഫ്റ്റിനുള്ള അവസരമാണ് പാഴാക്കരുത്.)

പന്തളം, കുളനട ഭാഗത്ത് വെച്ച് ഓട്ടോ ഇന്നോവയുടെ മുന്നിൽക്കയറി സന്ധൻ ബ്രേക്കിടണം. (ശബ്ദം മറക്കരുത്)

ഇനി ഞാൻ (എക്സേട്ടൻ ) ഓട്ടോയിൽ നിന്ന് സകല ഗ്രേ സോടും കൂടി ചാടി ഇറങ്ങും. ഖദറും പോലിസുകാരും ഞെട്ടി ഇറങ്ങുന്നതു ഫേഡ് ആയി കാട്ടാം. ഞാൻ (എക്സേട്ടൻ ) ഇന്നോവയുടെ അടുത്തേക്ക് മാർച്ച് ചെയ്യുന്നു.

ഞാൻ (എക്സേട്ടൻ ) ഇന്നോവയുടെ മുന്നിൽ തല തിരിച്ച് കെട്ടിയിരിക്കുന്ന ദേശിയ പതാക അഴിച്ച് നേരാം വണ്ണം കെട്ടുന്നു. പതാകയെ
ഞാൻ (എക്സേട്ടൻ ) സല്യൂട്ട് ചെയ്യുന്നു. ദേശിയ ഗാനം ബിജിഎം . എന്റെ (എക്സേട്ടന്റെ ) യൂണിഫോം ത്രിവർണ്ണത്തിലേക്ക് ഫേ ഡാകുന്നു.

സ്ക്രിനിൽ ടൈടിൽ “ഒപറേഷൻ ഒറാംഗ്‌ ഒട്ടാംഗ് ” . നല്ല ഉരുണ്ട അക്ഷരം വേണം. തെലുങ്ക് അക്ഷരങ്ങൾക്ക് നല്ല ചന്തമാണ്.

ആ പ്രബന്ധത്തിലെ ടെക്നിക്കുകൾ ഇവിടുത്തെ ഫാൻസിന് മനസിലാകാൻ ആരേക്കൊണ്ടേലും ഒരു ലേഖനം മാറുമിൽ എഴുതിക്കണം .
പടം തമിഴിൽ റീമേക്ക് ചെയ്തിട്ട് മലയാളത്തിലോട്ട് ഡബ് ചെയ്താൽ നന്നായിരിക്കും.

പി സ് : എന്റെ ഫാൻസിനെ ബ്ലോക്കും.അതാ ട്രെന്റ്

ജീവിച്ചിരിക്കുന്നവരുമായോ ഇനി ജീവിക്കാനിരിക്കുന്നവരുമായോ ഉള്ള സാമ്യം തികച്ചും യാദൃശ്ചികം